在當前競爭激烈的職場環境中，求職者面臨的不僅是職位本身的挑戰，還要應付面試官的刁難問題。尤其是合約工或短期聘用的員工，經常被HR質疑「為何頻繁跳槽」，被貼上「jumpy」的標籤，成為面試中的敏感話題。近日，一位從事合約工作的打工仔在社交專頁「奴工處」分享了自己的經歷，透露在面試時被HR直接質問「點解咁jumpy」，引發網民熱議與共鳴。
返合約工都被HR質問點解咁jumpy？
樓主：有次見工HR問我點解我咁Jumpy，份份工做一兩年就轉，我答佢：「我份份都係contract工，唔續約我都唔想。」
網民A：HR好煩㗎，做得耐冇轉工又嫌人，做contract工兩年一轉又嫌人。又要新娘靚又要禮金平，活在平行時空。
網民B：最憎啲HR話人Jumpy，邊有人一份工打一世。
網民C：證明個HR冇做功課去睇份CV。
網民D：Jumpy又話Jumpy，做咗5年又問點解做咁耐，唔睇下出面個世界都唔知想點。
網民E：contract工還好，最煩係嗰啲temporary工，通常唔會超過一年，又要嘥時間解釋。
網民F：HR表示，唔續你約，一定係你問題。
網民G：現實係要轉先有人工加。
網民H：資料已經畀齊，HR責任應該自己打去fact check。
網民I：以前做幾個月就唔做先叫Jumpy，乜而家一兩年都叫Jumpy咩？究竟係咁愛自己公司唔捨得走，定係根本走唔到？
網民J：之後人哋會懷疑你能力問題，人哋唔同你續約。
網民K：跟住嗰個HR實會咁問：「點解要做contract工？而唔搵長工？定係你有問題，人哋唔請你做長工？」
網民L：到你有份工做咗廿年唔走，佢又會有另一個問題。
網民M：點解唔續你？係咪你表現唔好？總之要挑剔就會搵到位。
不少網民對HR在面試時質疑求職者「跳槽頻繁」表達強烈不滿，認為HR的態度既矛盾又缺乏同理心。大家普遍指出，無論是長期任職還是短期合約，求職者都難逃被挑剔的命運：做得久被質疑缺乏競爭力，做得短又被標籤為「jumpy」。部分網民認為HR未仔細閱讀履歷，缺乏對現代職場彈性和合約工作的理解，甚至存在偏見，將合約不續約的責任全推給求職者。有人指出，現實情況是轉工才能爭取加薪，HR卻不願接受這一點。還有網民反映，面對HR的刁難，求職者往往需要花大量時間解釋，令人疲憊。
Article By CTgoodjobs