職場世代差異往往體現在工作習慣的小細節上，90、00後新生代追求工作效率與個人空間的工作方式，與60、70後資深打工仔重視即時溝通和面對面交流的傳統觀念產生衝突。近日，有網民在社交平台「Threads」發文，指其公司新老同事因戴着耳機工作一事爆發了爭吵，雙方各執一詞互不相讓。究竟戴耳機是有助於專注工作，還是不利於團隊溝通？
即睇事主分享及網民回應：
事主：今日公司嘅90後00後同60後70後開片，佢哋扮理性討論咁鬧交嘅話題係：返工可唔可以戴住耳機做嘢？
資深同事：「你聽住歌，聽唔到電話，聽唔到人叫你呀！」
後生同事：「我冇聽歌喎，而且降噪隻耳仔冇咁辛苦呀！」
資深同事：「我知你有聽收音機喎！」
後生同事：「我聽收音機嘅時候淨戴一邊耳仔！唔好屈我！」
呢個時候，班80後扮緊後生，又唔敢得罪老嘢，唔出聲。
網民A：公司有個00後，戴耳機戴到個個叫佢都聽唔到，已經私底下提佢兩次。有次我面對面同佢講嘢都唔除耳機，仲話：「吓？聽唔到。」嗰一刻我下定決心炒咗佢。
網民B：我80後，我戴耳機聽電台係因為周圍啲人講嘢好大聲，我完全冇辦法專心做嘢。講嘢大聲嘅人永遠唔知自己嘈到人，佢哋主要係想表現到自己喺度做緊嘢。我戴耳機聽住電台其實都仲聽到人哋嗌我，每次有人嗌我，我就會放低耳機同佢哋溝通，但我放低耳機呢個動作，畀個60後話過我，話佢覺得我好唔尊重佢，但都冇人尊重過我。把口生喺人哋到，是但啦，佢又唔係出糧畀我嗰個。
網民C：其實我覺得戴耳機冇問題，如果想叫佢，咪喺佢面前揮手叫佢，佢冇唔應就冇問題啦。如果面對面叫佢都扮唔知，就係唔尊重啦。因為其實好多人都需要靜啲嘅環境先做到嘢，Office有時啲人好嘈，令到其他人專心唔到。
網民D：有時啲Announcement係同全Team人講，唔會單單同你一個講，嗰啲佢講就講咗，就默認你已經知道，點知其實你聽唔到，Miss咗好多嘢。所以戴耳機前提係要聽到有人叫你。
網民E：睇吓做咩工啦。做啲唔使對客又悶又易做嘅嘢，戴耳機其實冇所謂。
網民F：以前唔會，但周邊都有人講電話或者Team meeting，好大聲好嘈，聽歌反而可以集中精神做嘢，不過好細聲，可以聽到人哋叫我。再者啲同事成日走埋嚟吹水，一嚟煩，二嚟自己阿姐會誤以為我掛住同人吹水（其實只係禮貌回應）。為免畀人誤會，我唯有戴個有Mic嘅Headset，等啲人以為我開緊Team meeting，一有人走埋嚟我就扮講電話。
網民G：我覺得除非份工係完全唔使同附近嘅人溝通，一個自閉位，否則好應該聽吓周圍發生緊咩大小事，學吓同事點做嘢，都係對自己有益。調返轉頭諗，如果其他人同你講嘢要講兩次，其實都唔係咁好，叫你又冇反應。可能而家啲人過於自我，唔係咁多人識閱讀空氣。
網民H：我每次返Office都長期戴住Headset扮開會，咁啲同事就唔會騷擾我。
網民I：我以前間公司一層有50人以上，靜過圖書館，半數人都塞住耳仔。有嘢講都係Online傾完先過去，你叫佢咪揚手叫佢囉。有啲人傾電話係方圓十里一齊聽，唔塞耳仔都做唔到嘢。利益申報：做緊啲冇Appointment，唔會有客上嚟嘅公司。
網民J：真係睇公司氛圍，以前間公司嚴就一定唔得，而家間公司只要做份內嘢唔會管太多。同事間嘈冇咩意思，問主管或老細意見，討論都可以慳返，因為永遠都唔會有結論，大家都只係為維護自己立場，絞盡腦汁講啲自己覺得係事實嘅理由。
網民K：如果工作多機會同人溝通，就建議唔好戴住耳機。但如果大家都係各自做自己嘢，其實戴耳機又無妨，有時活喺自己世界做嘢嘅人效率仲高，唔使成日同啲老海鮮Social，聽埋啲是非八卦嘢。
求同存異 互相理解
帖文一出，即引發不同世代網民的討論。有人指出戴耳機影響溝通效率，或會使打工仔錯過重要資訊；亦有網民表示辦公室環境吵雜，戴耳機能提升專注力；另有網民認為要視乎工作性質而定。職場相處貴在互相體諒，不同世代有不同的工作方式，與其堅持己見，不如嘗試理解對方立場，在效率與溝通之間找到平衡點。畢竟，一個理想的工作環境不應強求統一，而是讓不同工作風格都能創造最大價值。
Article By CTgoodjobs